相機質素
呢個相機話明係夜景模式既, 大體上黎講係幾好既. 但係當競爭咁激烈既時候, 單係向一方面做得好係完全唔足夠既.
相片既質素我認為未係最優化. 首先係 d 顏色, 試過影多幾次, 改過白平衡, 但係都係影唔到原色, 同原色差好遠.(不過部分相係因為部手機既 mon 有偏黃既情況, 所以預覽既時候好難確定需唔需要較白平衡) 第二, 曝光既問題. 情況係: 如果幅相一半係陽光充足既天空, 另一半係行人路同建築物係兩邊, 我要手動調整曝光度先可以睇清少少路面既情況. 如果唔較既話, 見到既只係一片黑色...
另外就係像素問題, 係唔係張相自動有壓縮或者拉大過呢? 用 Lumia 920 影完之後, d 相好似後期加工過咁, 但又做得唔理想, d 邊好似人工修整過咁. 我完全唔覺得呢個係一張靚相應該有既情況.
仲有就係 OIS (光學防手震), 呢個模件應該主要係俾拍片用既? 我測試既時候主要係影相, 唯一見到分別就係當我係電梯影 d posters 既時候, 都未停定, 好隨意拎出黎, 一禁就攪掂, 字都清楚睇得見. 不過就有 d 殺雞用牛刀既感覺...
 |
| 無做任何設定, 地面一片黑色... |
 |
| 較完個 EV 之後影出黎既 |
 |
| 如果係三叔粉絲可能會見過實物 =v= |
 |
| 話 OIS, 不過唔係完全放手震既, 但肉眼睇都係一片漆黑既 |
依家 d 手機功能多多, 電池差少少都可能唔夠用, 所以都唔少人會留意粒電有幾多 mAh (雖然都唔係完全能反應部機實際使用時間可以有幾長). Lumia 920 我會講粒電有 d 情況耗電量會比較慢, 例如個畫面關左或者 WIFI 關左咁. 一般情況如果兩樣都關左但係開住 4G, 加有時有 notification 開左個 mon, 幾個鐘粒電都無用左好多電. 因為我想一拎起部電話就有最快既速度, 所以兩個星期我都無設定過個行動數據做 3G. 但係我會建議如果部機閒置左好耐, 其實應該自動降速落 3G 或者 2G, 咁粒電應該可以再耐用 d? 仲有就係, 似乎如果長期 WIFI 揾唔到一個 access point 去連, 部機就會發熱咁, 一兩個鐘用左半粒電...
有線既叉電, 原本我以為叉得極度慢, 個半鐘先得廿個百分比? 然後我發現如果一路用住部手機回 whatsapp 同 down apps, 個叉電速度先會咁. 如果閒置咁叉, 速度係接受到既. 但呢個係唔係正常? 我覺得我都唔係用得好勁既, 但係差別咁大? 我就接受唔到咁既質素啦...
 |
| 個附送既插頭係出 1A 既 |
奇怪既天線...?
關於個行動數據信號, 似乎部手機如果落左去 3G, 好難自動升得番上去 4G. 我要重新開關番個行動數據佢先上番去 4G. 點解會咁呢? 而且我仲以為係一 d 死位所以咁啦, 但似乎係偵察信號既時候, 出左 d 問題. 其中一次測試係用 3 既 sim card, 呢部 Lumia 920 最多都係上到 “H”, 信號都未收爆, 但係用另一部手機就可以上到 4G. 似乎手機既接收唔係咁好.
備份功能完全唔夠用...
間 Nokia 専門店既職員話我知, 我可以將 d contacts 藍牙去新既手機, 呢個功能係幾好既. 而且要將 contacts, emails 同 SMS 備份係無咩難度. 但係 apps 既資料竟然係無得備份? 我轉手機既時候, 覺得最煩係所有野都要重新裝過一次. 如果無方法可以俾我一次將所有 contacts, emails, SMS, apps 同設定都一次過過曬入新機, 其實我會覺得無論我轉去其他平台既新機都係一樣, 無必要又買番 Windows Phone. 而且我幾關心我 d 遊戲資料. 例如 Blocked in 咁, 遊戲進度係存係部手機裏面既, 假如我要轉新機或者拎部機去整既時候, 你都俾我備份左 d 遊戲進度去某個地方先呀. 有時辛辛苦苦用時間換番黎既進度原來一壞機就會無曬既, 真係無咩心情重頭再玩過. 係果一刻, 我相信絕對會有股強烈既沖動轉去第二個平台.
 |
| 備份設定既界面 |
我好驚訝點解 Lumia 920 既內部咁脆弱... 點解個 sim card 既接觸位係咁脆弱? 外面有幾堅硬, 如果換幾次 sim card 就會壞既, 聽起上黎係唔係好奇怪先?
我試過揾 Nokia Care Centre 幫手, 但佢同我講 $2,900 換底板, 果一刻真係灰左. 對我黎講完全唔合理, 所以我無視保養做工程師, 因為就算我自己整壞左都唔會再去 Nokia Care Centre. 就幾粒螺絲就開得到. 打開佢見到裏面係幾整齊既, 兩下就去到 sim card 接觸位. 不過焊工唔係咁好, 仍然係好脆弱. 但重點係才不過係兩個星期, 個維修價咁高, 真係完全唔打算有人會拎去整, 一係其實個 Care Centre 係開門釣水魚既...
 |
| 一部分既節錄, 好在去到都話有張單就無問題, 如果唔係就真係未見官先打八十大板... |
以上就係我呢兩個星期用 Nokia Lumia 920 既經歷. 買既時候真係懷着一個好開心既心情買, 因為終於可以換新機啦, 終於可以俾部 5800 休息下啦. 但點知一個月都無就壞左個 sim card 位... 如果佢輕 d 都可以當 MP3 機聽下歌, 或者假如佢多番 d 遊戲既話可以當遊戲機. 但係又重, 又無 apps 又無遊戲, 唔通要當佢係鬧鐘...?
真係希望越大失望越大...
Lumia 920 (7 Feb 2013 - 21 Feb 2013)