Nokia Lumia 920 用後感 - 上篇 Part 1

我為左買部新電話睇左好耐, 五月開始, 見住 d friends 買左唔同既機, Google Galaxy Nexus, Apple iPhone 4S, Sony Xperia TX, 近呢幾個月就 Samsung Galaxy S3, Samsung Notes II 同 Apple iPhone 5. 雖然呢 d 型號都有一兩個 points 我係幾鍾意既, 但係點解就唔可以有部機有齊咁多個優點呢?
我等咁耐其中一個原因係因為我賺既錢唔多, 唔可能個個月換新機, 既然係咁就要揀部好鍾意既機, 免得用下用下越用越暴力啦... =v=”

左至右: Nokia Lumia 920 (我), HTC One X (姐), Samsung Galaxy S3 (二姐)

不過咁長時間, 唔多唔少都會有 friends 問我, "你仲等緊d 咩呀? 你唔係話 X okay 咩? 點解又唔買呀?" 或者係 "點解唔買 Y 呀? 幾好呀, 又新又輕又薄." 然後係幾個月前, 我以為我終於見到部我想要既機...
我以前用既幾部手機都係 Nokia. 我既第一 二部機係 Nokia 既黑白機. 第三部就係 Nokia XpressMusic 5800. 兩個星期前, 我既同事好有我心咁陪左我去 Nokia 専門店買部紅色既 Lumia 920. 我同事曾經問過我一個問題: "點解係 Lumia 920?” 我心裏面好似有個又直接又簡單既答案, 諗番轉頭, 我好似睇唔透咁...

左邊係 Lumia 920, 右邊係我用左幾年既 XpressMusic 5800

買機前, 我覺得 Lumia 920 係一部設計得好好既機. 我以為即使廣告有幾呃人都好, 我都覺得影出黎既相都應該有番咁上下質素既? 即使要我等到二月香港先有紅色開賣, 我覺得呢個等待都係值得既. 即使其他有名既公司都係賣緊差唔多價位既手機, 呢部都係值既.
仲有就係, 我以為 Windows Phone 8 係一個全新既design, 咁應該都有番咁上下既? 見到果 d 咁特別既 Live Tile, 我以為可以做到我諗到既野. 我以為即使 Windows Mobile 個名曾經有幾差, 都唔代表 WP8 係唔好既. 我以為其他人只係先入為主, 未試過所以先會話佢唔好.
所以基於以上兩個睇法, 我都係以為我終於可以有新機用啦~ 我一直都好相信如果唔自己試下, 係好難肯定果樣野係好定唔好既.

以下係我買左 Lumia 920 後兩個星期既經歷:

超鍾意個外形~
我買紅色既其中一個原因係因為呢隻色好特別好靚, 我都完全無諗過要買個殼或者套包住佢. 而且因為係 Gorilla Glass, 我覺得連保護貼都係唔需要既. 然後因為個牌子, 我都幾有信心就算我唔小心跌左部機落地, 我都唔洗擔心部機會壞. (反而我會諗個地板會唔會花左呢...) 雖然好好彩, 一次都冇跌過. 另外就係個畫面的確好敏感, 唔需要一定用手指先可以控制到. 而且個 high contrast mode 可以係個畫面面向太陽光既時候都可以清晰地見得到畫面既字(雖然我覺得影相既時候, 呢個 mode 應該 disable 左佢, 因為係超難睇清楚究竟影得好唔好)

Lumia 920 既背面係光面既, 但好似黑色同＿

Apps 既數量嚴重不足...
我日常一般係上下網, 聽下歌, 睇下 emails, facebook 或者 whatsapp. 係我呢兩個星期都只係玩下 “Blocked in” 同一兩隻其他 games 咁. 有時我會用下 Nokia Map 睇下 d 我好少行既路點樣去或者睇下 OpenRice 一 d 晚餐既建議. Apps 既使用量可以算係非常少. 我諗其中一個原因係因為 App Market 幾乎冇一隻吸引到我去下載! 我連 paid apps 條 list 都睇左幾次, 我都唔知道 download d 咩好...

The Sims 3? 最新版究竟去左邊?

Nokia Map 其實都唔差
Nokia Map 既資訊其實幾夠用, 用左兩個星期, 有 d 冇咁出名既建築物都揾得到. (因為新年要去拜年既關係, 所以有機會用一下) 但係我有少少意外點解 Nokia Map 裏面冇指南針既功能既? 最起碼你都話我知我要向邊個方向行啦... 仲有, 有時我揾路既時候, 我會發現條建議路線變左條直線, 而唔係跟住條路行既線. 或者 Nokia Map 唔夠資料畫條香港公共交通工具既行走路線?

Nokia Map 既一部分九龍塘區既截圖
一條 Google Map 暫時 route 唔到既路線...

Nokia Transport 我覺得係超額完成... 咪住, 咁既!?
一開始我真係以為只可以係美國或者歐洲先用得. 但係一查條路應該點行既時候, 發現佢出果條就正正係我搭車番工既果兩個方法! 我諗應該唔係 Nokia 特別地入左呢條路線掛? 不過多查幾下, 發現唔見左岩岩果個建議搭車方法既? 真係咁唔穩定?
Nokia CityLens 未夠實用
雖然個 Augmented Reality 呢個技術係幾特別, 但係有技術都唔一定係好 apps, 呢個係一個反面例子. 例如我想搜一下附近既餐廳, 我期待既係排左評價度既清單, 又或者係個實景睇到既, 唔單止係幾多粒星星, 可能係個字大少少同細少少, 代表有幾多人食過之類, 而唔係單單得個距離, 離我有幾遠, 同五粒星星咁簡單. 講真, 我有時唔介意行遠少少食間好味 d 既, 但最起碼你要話我知真係有幾好味先得...
點解唔係 Nokia Music (Player)?
我唔係話 Nokia streaming service, 雖然香港冇得用. 我係想講一個更加全面既 music player app. 有時其實唔單止話部機既硬體有幾勁就得, 軟體做得好少少其實可能可以得到唔少人既賞識. 其實個諗法都唔係我諗出黎既, 係咁岩網上見到, 又覺得 “係 wor, 如果有齊呢 d 功能好似又真係開心 d wor.” 仲有一點幾重要下: 點解唔係跟機就支持 FLAC 或者 MKV 既?

上篇中段評分: 唔係咁特別
WP8 介面係幾親切既, 或者講 Nokia 既內置 apps 都唔係完全一無事處, 但係講整體評價好合理地需要包括 apps. 從數量或者質量黎講, 而家係完全無法接受. 即係簡單講個 Facebook app 已經做得唔好, 簡直就係難用! 即使你話係商用手機, 我都想講個 Office 既質量同 Skydrive 既整合都好有問題. 呢 d 會係接下落黎既部分詳細咁講.