Yahoo! 停用舊有服務

近排真係唔少大公司都有收購或者減少不必要開資既舉動，睇黎依家唔夠集中發展真係好難生存。而近期就有 Yahoo! 停了部分自己早期開發既服務，其中包括地圖同 Pipes。

通常自家開發一個 app 或者服務然後找投資者投資一大筆錢，通常對方頭一兩個問題就會問及「你地幾時開始會有盈利？」或者「五年可以賺到幾多錢？」。投資者唔係開善堂，唔會投資落一啲佢地唔覺得會賺錢嘅嘢，有啲更會要求短期內賺大錢。先唔講佢地眼光係咪真係咁獨到，但要拎到佢地啲錢真係要花唔少前期工夫。

但如果一開始唔係靠投資者，而係食老本，自資開發，咁就要靠自己同你嘅團隊判斷究竟咩時後要停止開發。當然要視乎自己手頭資金，如果真係好相信自己嘅諗法無錯，就當然要繼續堅持落去。

而 Yahoo! 最新停左嘅服務，地圖同 Pipes 都係 2007 年出嘅產品。8 年嘅時間，相信係因為後來者做得好，所以決定都係時候了結部分產品。

地圖服務

Yahoo! 地圖

講起地圖，大家已經自動波話 Google Map，可想而知有嘅深入民心。而 Yahoo! 地圖近幾年已經轉用第三方嘅服務，Nokia HERE 嘅地圖資料、Yelp 嘅餐廳資料等等。

依家 Facebook 都由 Bing 變左做 HERE Map～
https://www.facebook.com/me/map

大概轉用左第三方資料之後，Yahoo! 過左三、四年都揾唔到一個能夠賺錢嘅方法，而且呢類資料性嘅比較難有再突破，所以唯有停左地圖服務佢。

資料抽取及整合

Yahoo! Pipes

其實呢個方向幾唔錯，而且都有唔少嘅公司都有做，依家比較出名嘅相信係 IFTTT，希望做到嘅嘢就係將啲重覆性嘅工作轉為自動化，咁就唔洗每日去睇住一堆嘅網頁之類嘅，相信會慳番唔少嘅時間。

雖然 Yahoo! 的確方向無錯，可惜佢無法將個服務同使用過程簡化，設定繁複，要唔少時間去學或者整一個新嘅功能去睇另一個網站之類。

單係睇介面已經覺得好複雜

相較之下 IFTTT 介面真係好簡單

大概因為用家量唔達標，而且開始出現強勁嘅競爭者，順理成章嘅唯有停左佢。

小結：專一啲或會有番作為

Yahoo! 自從轉左 CEO 好之後都有好多好多嘅改變，由搜尋為主變番做出內容嘅公司，將無咩人用或者已經欠競爭性嘅服務都停曬。雖然唔知是好是壞，但凡是做得專少少、仔細少少，應該都有一番作為嘅。
條條大路通羅馬嘛。

Reference:

[The Next Web]